*””ಆಗುವುದಾದರೆ ನೀ “”*

*””ಆಗುವುದಾದರೆ ನೀ “”*

ನೀ ಏನಾದರೂ ಆಗುವುದಾದರೆ
ಕೊನೆ ಇರದ ಕಡಲಿನಂತಾಗು
ಶತ್ರುಗಳು ನಿನ್ನ ಸಾಮರ್ಥ್ಯವ ಅಳೆಯಲಾರದೆ ಸೋಲುವಂತಾಗು

ಮನವೇ ನೀ ಆಗುವುದೇ ಆದರೆ
ಬೀಸುವ ತಂಗಾಳಿಯಾಗು
ಕಷ್ಟದುರಿಯಲಿ ಬೆಂದವರಿಗೆ
ತಂಪೆರೆಯುವ ಮಂದಾನಿಲವಾಗು

ಆಗುವುದೆಂದು ನಿರ್ಧರಿಸಿದರೆ
ಸುಡುವ ಸೂರ್ಯನಂತಾಗು
ನಿನ್ನೇಳ್ಗೆಯ ಸಹಿಸದವರು ಸನಿಹಕ್ಕೂ ಬಾರದಂತಾಗು

ನೀ ಆಗಿಯೇ ಆಗುವುದಾದರೆ
ತಾಳ್ಮೆಯ ರೂಪ ಧರಣಿ ಯಂತಾಗು
ಕಷ್ಟಗಳ ವಿಧಿ ಮಳೆಗರೆದರು
ಅಂಜದ ಪರ್ವತದಂತಾಗು

ನೀ ಆಗಲೇ ಬೇಕೆಂದರೆ
ಮಳೆ ನಿಂತು ಹಗುರಾದ ಮುಗಿಲಾಗು
ಕಿವುಡರ ಸಂತೆಯೊಳಗೊಂದು ಸಿಡಿಲಬ್ಬರದ ಶಬ್ಧವಾಗು

ಮಧುಮಾಲತಿ ರುದ್ರೇಶ್ ಬೇಲೂರು